LAOAG CITY – Inpakaammo ni Mayor Edmar Vincent Bonoan nga inside job ti napasamak a panagpukaw dagiti sumagmamano a medical equipment iti Municipal Health Office iti ili ti San Nicolas.
Segun kenkuana, daytoy ket kas basar iti imbestigasion ti San Nicolas Municipal Police Station.
Inbatadna a nangisayangkat daytoy ti taripnong kadagiti amin nga empleado ti Municipal Health Office.
Inlawlawagna nga inside job ti napasamak gapu ta awan ti force entry wenno awan dagiti nadadael a ridaw wenno tawa a mabalin a nagserkan dagiti nangala.
Kunana a posible a dagitoy ket aggapu iti uneg wenno adda ti duplicate-da a dati.
Mainaig iti daytoy, adu dagiti kalikagum ni Mayor Bonoan a maiplastar tapno saanen a maulit pay ti napasamak kas ti pannakaipan ti rehas kadagiti ridaw ken tawa pakairamanan ti pannakatarimaan kadagiti bisagra a naperperdi ken pannakaimuntar ti Close Circuit Television wenno CCTV camera.
Naammoan a dagiti napukaw a medical equipment ket sumagmamano kadagitoy ket donasion idinto a dagiti dadduma ket ginatang ti Local Government Unit.
Maipalagip a karaman kadagiti mapukpukaw ket ti dua a Microscope nga agbalor ti P80,000.00 iti tunggal maysa; maysa a Micro Hematocrit Centrifuge nga agbalor ti P80,000.00; maysa a Serum Electrolyte Analyzer Machine nga agbalor ti P600,000.00; ken maysa nga AVR nga agbalor ti P6,000.00 nga agdagup ti P846,000.00.
