LAOAG CITY – Inpakaammo ni Mr. Bobby Acosta, ama ti pimmusay a Region 1 Athletic Association gold medalist a ni Carl Niño Acosta a residente iti Barangay 45 Tangid ditoy siudad ti Laoag a ti panagpukaw ti koriente iti Mariano Marcos Memorial Hospital and Medical Center iti siudad ti Batac ti maipagarup a nangpakaro iti situasion ti anakna.
Segun kenkuana, agarup dua a minuto a nagpaut ti panagpukaw ti koriente nga isu ti ad-adda a nangparigat iti kondision iti anakna.
Inbatadna nga iti uneg ti dua a minuto a panagpukaw ti koriente ket nabayag daytoyen para iti anakna nga adda iti kritikal a kasasaad nangruna ket adu dagiti nakasab-it kenkuana a landok ken tubo a mangsupsuportar iti bagina.
Inlawlawagna nga adda met ti generator ti ospital ngem rumrummuar a saan nga insigida a nagoperar banag a nangparigat iti anakna.
Mainaig iti daytoy, kuna ti ama nga Acosta nga immabot ti agarup tallo nga aldaw sakbay a naipadalan iti operasion ti anakna no sadinno a simmayaat daytoy ngem makapaspasar ti panagpanateng ken panaglamlamming.
Innayonna a saanna a malipatan dagiti gundaway a naragsak ti anakna nga ipakpakaammona kenkuana tunggal makaiyawid isuna ti medalya.
Naammoan a nagtalinaed ti sumurok maysa a lawas ti anakna iti ospital no sadinno nga Abril 20 idi naitaray iti ospital idinto a Mayo 1 idi pimmusay daytoy.
Maipalagip a na-out of balance ni Carl Niño iti panagpuligosna iti ngato rason a saanna a nabalanse ti panagdissona iti gymnastics springboard.
Immuna iti daytoy, nakagun-od ni Carl Niño ti tallo a gold medals ken dua a bronze medals iti Region 1 Athletic Association ken manarimaan ti panagsagsaganana para iti mapaspasangasangan a 2026 Palarong Pambansa nga irepresentarna ti intero a rehion uno.
Kabayatanna, inpasingked ni Mayor James Bryan Alcid ti pannakaipaay ti tulong manipud iti lokal a gobierno ditoy siudad ti Laoag iti nasao nga atleta.
Iti agdama, ikarkarigatan ti Bombo Radyo Laoag News Team nga alaen ti takder wenno reaksion ti nasao nga ospital mainaig iti daytoy a napasamak.
