LAOAG CITY – Inbatad ni Police Lt. Col. Mar Louie Bondoc, ti chief of police iti PNP-Laoag nga agtultuloy ti imbestigasyon da mainaig iti papan panangserrek ti maysa a menor de edad iti balay ni Evelyn Corpuz, agtawen ti 62, naasawaaan, agtagikua ti maysa a travel agency ken residente iti Barangay 9, Balintawak St. ditoy ciudad ti Laoag.
Daytoy ket tapno maamoan da no kadwa ti menor de edad ti ama iti papanna panangserrek ti balay ni Corpuz.
Inlawlawag ni Bondoc nga idi damo ket adda ti panagdudua da no pudno a menor de edad ti suspek gapu ta dakkel daytoy nga ubing.
Nupay kasta, nakumpirmaran da nga agtawen pay laeng daytoy iti 16 basar iti school ID na ken iti pannaki-koordinar da iti Sinait Municipal Police Station.
Malaksid ti daytoy, masdaaw pay dagiti otoridad iti kaalisto ti ama na a dimmanon ditoy ciudad ti Laoag tapno mapanna kitaen ti anak na idinto nga aggapo daytoy idiay Sinait, Ilocos Sur.
Gapu ti daytoy, adda ti panagatap dagiti otoridad amangan no kadwa met laeng ti menor de edad ti ama na idi insayangkat na ti krimen.
