LAOAG CITY – Inbatad ni Police major Artemio Clemente, ti chief of police iti ciudad ti Batac nga agtultuloy ti naiget nga imbestigasyon da mainaig iti maipagarop a pannakabagkong ti maysa nga estudyante iti paset ti Batac-Banna road iti Brgy. San Mateo iti nasao a ciudad.
Nabigbig ti biktima a ni Jake Zendorf Aguilar y Flores, agtawen ti 21, baro, estudyante iti Northwestern University ken residente iti Brgy. Manalpac iti ili ti Solsona.
Inlawlawag ni Clemente a basar iti inisyal nga imbestigasyon da, inbaga ti biktima a manipod iti ili ti Solsona ket immay iti kasera na iti Barangay Buttong ditoy ciudad ti Laoag kalpasan na ket napan iti ciudad ti Batac tapno mapanna koma sarungkaran ti uliteg na nga agkaskasera.
Nupay kasta, naibaga ti agbanbantay a saan pay a napnapan ti uliteg na iti kasera na isut gapuna a pimmanaw met laeng ken agawid koman iti ili ti Solsona idi adda ti nangsaruno a dua a lallaki a naglubbon iti maysa a motorsiklo met laeng.
Segun ken ni Clemente, inbaga ti biktima nga idi nadanun da ti umuna a kurba iti Batac-Banna road ket ditoy a sinada dagiti suspek ken bimmaba ti maysa a napan nangbagkong kenkuana, ken idi ipamindua koma ti suspek bagkongen ti biktima ket ditoy a limmabanen ni Aguilar.
Inbaga ni Clemente nga inpasingked ni Aguilar nga awan ti nakarirriri na malaksid iti panagtestigo na idi iti kaso a murder iti ili ti Solsona, addan sumagmamano a tawen ti napalabas.
Inpakaammo ni Clemente a nalasin ni Aguilar ti plate number ti motorsiklo a nagluganan dagiti suspek ken daytoy ti naiget nga im-imbestigaren da babaen ti pannakikoordinar da iti Land Transportation Office (LTO) tapno maamoan no siasinno ti agtagikua iti nasao a motorsiklo.
Nagkedked metten ni Clemente a nangipublikar ti plate number ti motorsiklo tapno saan a maapektaran ti isaysayangkat da nga imbestigasyon.
Immunan a naireport a gapu iti napalalo a buteng ni Aguilar ket inkarigatan na ti nagawid iti ili ti Solsona babaen iti pannagna nan iti ili ti Banna tapno iti Rural Health Unit (RHU) iti ili da ti pagpaagasan na.
Ngem gapu ta nakaro ti sugat na ket naiyakar met laeng iti Mariano Marcos Memorial Hospital and Medical Center iti ciudad ti Batac, ngem iti agdama ket addan iti nasayaat a kasasaad.
