LAOAG CITY – Inbatad ni Mr. Noel Andres, ti pannakangiwat ti Ilocos Norte Electric Cooperative (INEC) a nakigtot gapu ta nagbalin nga isyu ti pannakagutigot dagiti residente iti ili ti Dingras nga agbayad pay laeng ti konsumo da iti kuryente iti bayad center, gcash, paymaya ken dadduma pay a mabalin a pagbayadan iti online.
Daytoy ket tapno maliklikan ti possible a panagngato ti bilang ti kaso ti covid-19 iti nasao nga ili.
Inbaga ni Andres a para kenkuana ket saan a panang-discriminate ti pannakaipawil pay laeng dagiti taga Dingras a mapan iti main office ti nasao a kooperatiba tapno isu ti pagbayadan da iti nakonsumo da iti kuryente.
Inpakaammo pay ni Andres nga iti pannakisarita na ken ni Engr. Felino “Bing” Agdigus, General Manager iti INEC ket inbaga na a saan a pannakailanglangi kadagiti taga Dingras ti inaramid da no di ket kayat da laeng a protehiran dagiti empleado ti kooperatiba kontra iti makapatay a virus.
Segun pay ken ni Andres, inkalintegan ni Agdigus a no bilang maapektaran dagiti empleado iti INEC ti virus ket adda ti posibilidad na a maapektaran ti sibubukel nga operasyon ti nasao a kooperatiba.
Inpasingked pay ni Andres a ti napagsasaritaan ti management ti INEC ket dagiti apektado ti lockdown ket maikkan ti konsiderasyon iti panagbayad da no sadinno a saan da a mapatawan ti multa no maladaw da a makabayad idinto a no subject for disconnection ket awan ti pannakaputol ti kuryente.
Mainaig iti daytoy, inbaga ni Andres a maawatan da ti takder ni INEC President Enrico “Cocoy” Ruiz a kayat na laeng a maprotehiran ti karbengan dagiti member-consumers a residente iti ili ti Dingras.
Immuna iti daytoy, inbaga ni Ruiz iti Bombo Radyo Laoag a nasakit unay ti nakem na iti maipagarop a pannakailanglangi dagiti consumers a residente iti ili ti Dingras a mapan kuma agbayad ti kuryente iti main office.
