LAOAG CITY – Agtultuloy pay laeng ti imbestigasyon mainaig iti pannakapaltog ni Provincial Security Guard Roderick Manuel a taga Barangay 53, Rioeng ditoy ciudad ti Laoag kabayatan a nakaduty iti Provincial Engineering Office.
Daytoy ti inbatad ni Police Lt. Col. Amador Quicho, ti chief of police ditoy ciudad ti Laoag.
Segun ken ni Quiocho, iti panangisayangkat da ti reenactment ket rumrumuar nga “accidental firing” ti napasamak.
Innayon na nga iti panagdamdamag da iti lawlaw ti Provincial Engineering Office ket naibaga ti maysa a guwardya a maysa laeng a putok ti paltog ti nangngegna.
Maikontra daytoy iti naibaga ti kadwa ni Manuel a ni Provincial Security Guard Theodoro Agbayani Herbacio, 54, awanan ti asawa ken residente iti Barangay 3, San Pedro iti ili ti Vintar a dua a putok ti paltog ti nangngeg na.
