LAOAG CITY – Agtultuloy paylaeng ti naun-uneg nga imbestigasyon ti Philippine National Police mainaig iti pannakapaltu-paltog a poon ti nakatayan ni Barangay Chairwoman Helen Abrigado iti Barangay Ferdinand iti ili ti Marcos.
Daytoy ti inbatad ni Police Major Jhonevale Maramag, ti chief of police iti ili ti Marcos.
Segun ken ni Maramag, agpapa ita ket awan pay ti pamal-palatpatan da no ania ti motibo ken no siasinno dagiti suspek a nakalugan ti motorsiklo a nangpaltu-paltog ken ni Abrigado.
Kuna ni Maramag nga irebisar da amin dagiti Closed Circuit Television (CCTV) a nakaimuntar kadagiti lugar a nagdalanan ti convoy ti kapitana ken mangnamnama a makatulong dagitoy tapno maamoan no sinursurot dagiti suspek ti grupo ti biktima ken no adda pay ti sabali a nagturungan da.
Inpakaammo pay ni Maramag a naala dan ti palawag dagiti kakadwa ti biktima ken agpapada ti bersyon da mainaig iti napasamak.
Mainaig iti daytoy, kuna ti opisyal a ti nausar iti krimen ket maipagarop a kalibre 45 a paltog.
Inrakurak pay ni Maramag nga awan ti inrepreport kadakuada ti biktima a naaw-awat a pangta iti biagna isut gapuna a nakigtot da iti napasamak kenkuana.
Innayon na nga uray idi nagtakem kas kameng ti konseho iti ili ti Marcos ni Abrigado ket dagiti nadamdamag da a nakariri na gapu ta ado dagiti makapaneknek no kasanu ti kinasayaat na a tao, alisto a maasitgan ken managtulong.
Kabayatanna, saan pay a maibaga ni Maramag no ania dagiti tama ti biktima gapu ta saan pay a naipadalan ti otopsiya ti bangkay ti kapitana.
Inpalgak na nga iyur-uray da ti desisyon ti pamilya ti biktima no kayatda a maotopsiya ti bangkay ni Abrigado.
Immunan nga inpakaammo ni Maramag a kalpasan ti lantern parade ket agawid koman ti grupo ti biktima a nakalugan iti Mitsubishi L300 FB a kukua ti Barangay Ferdinand ken inturong ni Brgy. Kagawad Carlo Bagaoisan, ngem idi adda da iti karayan iti paset ti Brgy. Tabucbuc ken ditoyen a napaltu-paltugan ni Abrigado babaen kadagiti dua a lallaki a naglubbon iti motorsiklo.
Naitaray ti biktima iti Doña Josefa District Hospital babaen kenni Kag. Bagaoisan ngem naiyakar daytoy iti Mariano Marcos Memorial Hospital and Medical Center iti ciudad ti Batac nga isu metten ti nakatayan na gapu kadagiti sinagaba na a nakana a sugat.
Inpakaamo ni Mayor Antonio Mariano iti ili ti Marcos a mangipaay iti 300,000 a pisos kas gunguna iti makaibaga nu siassino iti adda iti likodan ti pannakapapatay ni Brgy. chairwoman Helen Abrigado iti Brgy. Ferdinand iti nasao nga ili.
Inpalgak ti mayor a nasakit iti nakem iti nakaam-ames a napasamak iti nasao a kapitana.
Inbatad na a nasinged da nga agpagayam ken ni Abrigado kagiddan ti pananglagip na ti panagkadkadwa da idi nagtaray a para Sang bayan member iti ili ti Marcos idi 2019 no sadinno a napagasatan da a nangabak.
Segun iti mayor, kalpasan iti panagtakem ni Abrigado a kas sangguniang bayan member ket nagdesisyon na nga agsubli a kas kapitan iti barangay da gapu ta isu ti kaykayat na a pagtugawan a posisyon iti gobierno.
Inpetteng ti mayor nga awan ti ammo na a rason nu apay a pinatay da ti kapitana gapo ta nakasaysayaat a tao.
