LAOAG CITY – Agtultuloy ti imbetigasyon ti Philippine National Police (PNP) mainaig iti pannakapalto-paltog a poon ti nakatayan ni Engr. Rommel Dizon iti maysa a paglakoan kadagiti accessories ti lugan iti Brgy. 2 iti ili ti San Nicolas.
Daytoy ti inbatad ni Police Major Joseph Baltazar, ti chief of police iti ili ti San Nicolas.
Segun ken ni Baltazar, iti agdama ket manarimaan ti panangrebisar da kadagiti CCTV footages a naimuntar iti lugar kangrunaan na iti direksyon a maibagbaga a nagturung ti riding-in tandem suspects.
Malaksid iti daytoy, inbaga ni Baltazar a manarimaan ti panangala da ti affidavit kadagiti dadduma pay a nakakita iti insidente.
Innayon na nga awan pay ti naestablisar da a motibo iti pannakapapatay ni Dizon gapu ta agtultuloy pay laeng ti panagimbestigar da mainaig iti personal a kinatao ti biktima.
Mainaig iti daytoy, inpakaammo ni Baltazar a mabalin a nabayagen a sipsiputan dagiti suspek ti biktima ken idi nagturong iti paglakoan ti accessories ti lugan ket sinurot da daytoy.
