LAOAG CITY – Kinumpirmaran ni Police Corporal Rolly Ramoran Jr., imbestigador iti PNP-Bangui nga accident prone area ti nakadesgrasyaan ti maysa a bus a nakasugatan dagiti 12 a pasaheros idiay Barangay Baruyen idi nasao nga ili.
Basar iti resulta ti imbestigasyon dagiti kameng ti PNP-Bangui, napukawan ti preno a rason a na-lost control ti driver a ni David Garcia a nangitunda ti pannakaidungpar t bus iti bunton ti darat nga adda iti igid ti kalsada.
Segun kenni Ramoran, no awan ti bunton ti darat iti nasao a kalsada ket mabalin a nakarkaro ti nagbanagan ti aksidente.
Inbatad na a basar iti palawag ni Garcia, idi agsalg ti inturong na a bus ket mayat pay laeng ti preno na ngem idi nakadanon da iti agkurba a paset ti kalsada ket kellaat a napukawan ti preno a rason ti pasamak.
Kunana nga awanen ti sabali a napanunut ni Garcia a wagas wenno pamuspusan no diket ti nangidungpar iti bunton ti darat.
Innayon na a basar pay kenni Garcia ket regular a macheck-check up ti bus ngem kuna ni Ramoran nga adda ti gundaway a saan a mapakadaan ti insidente.
Maipalagip a 12 a pasaheros ti nasugatan ken naitaray iti Bangui District Hospital ken tallo kadagitoy ti naiyakar iti ospital ditoy ciudad ti Laoag.
