LAOAG CITY – Nakigtot dagiti residente saan laeng a dagiti taga ciudad ti Laoag no ket iti sibubukel a probinsya ti Ilocos norte iti pannakatay ni Vice Mayor Michael Fariñas kalpasan a naaksidente iti by-pass road iti paset ti Barangay Vira iti nasao a ciudad.
Ummunan a naireport a nag-overshoot ti mercedes benz ti bise mayor gapo ti maipagarop a kinataray ti lugan na no sadinno a naidungpar iti concrete barrier ken nagpulpuligos sakbay a natennag iti kataltalunan ken nauram.
Gapo iti daytoy, nagsagaba ti nakana a sugat kangrunaan na iti ulo ti bise mayor no sadinno a rimwar pay ti utek na ken saanen a mailasin ti rupa na.
Naamoan a ni Fariñas ti nagdrive ken saan a naka-seatbelt idinto a ti kadwa na a bodyguard na a ni SPO2 Melchor Geronimo ket nakaseatbelt ken nagsagaba ti sugat ngem addan iti nasayaat a kondisyon.
Kalpasan a bimtak ti damag seknan ti pannakatay ti bise mayor ket napagsasaritaan iti social media nangruna iti facebook ken ditoy nga inpadanon dagiti taga Ilocos Norte sadinno man a paset ti lubong ti pannakipagladingit da iti pamilya Fariñas.
Ni Fariñas ket nabayag a nagserbi kas mayor ditoy ciudad ti Laoag sakbay a nagbalin a bise mayor ken daytoy ti Battalion commander ti 101st Reserved.
