LAOAG CITY – Inbatad ni Senior Fire Officer-1 Maximiniano Ligsay Jr. iti Bureau of Fire Protection iti ili ti Bacarra a possible a ti nabaybay-an a malutluto ti nangitunda ti pannakauram ti maysa a balay a pagnanaedan ti tallo a pamilya iti Barangay Corocor iti nadakamat nga ili.
Inlawlawag na a naduktalan da a kabayatan ti panaglutluto ti maysa kadagiti agnaed iti balay ket pimmanaw.
Kuna na a basar pay iti karruba ti maseknan ket masansan a kastoy ti ar-aramiden na isut gapuna nga adda dagiti gundaway a makset dagiti lutwen na.
Naamoan a ti nasao a balay ket namindua a daras a na-extensionan no sadinno a ti orihinal ket daan a balay a 2-storey ngem nangisariping ti dua a dadakkel a kwarto ti dua nga agkabsat nga isu ti pagnanaedan da.
Inpakaammo ni Ligsay a basar iti patta-patta da ket sumuruk-kumurang a 300 a ribo a pisos ti balor ti nauram a balay, ngem saan pay a karaman ditoy dagiti nadadael a kagamitan.
Innayon na nga agtultuloy paylaeng ti imbestigasyon da tapno maamoan no ania ti pudno a nangitunda iti pannakauram ti balay ti Pamilya Buduan.
