LAOAG CITY – Personal grudge ti kitkitaen a motibo ti Philippine National Police iti napasamak a pammaltog a nakatayan ti maysa a babai a ni Josephine Rara iti Barangay 43, Cavit ditoy ciudad ti Laoag.
Daytoy ti inbatad ni Police Lt. Col. Joseph Baltazar, ti chief of police ditoy ciudad iti eksklusibo nga interview kenkuana ti Bombo Radyo Laoag.
Inlawlawag ni Baltazar a personal grudge dagiti makitkita da a motibo gapu iti negosyo ti biktima nga online selling no sadinno nga aglaklako kadagiti sabon a paglaba.
Nupay kasta, kuna na nga itultuloy da latta ti mangiyuswat ti naun-uneg nga imbestigasyon ken saan da nga iwalin dagiti dadduma a possible a motibo iti krimen.
Inpakaammo ni Baltazar nga pinaeksamen ken pina-cross match da dagiti nakumpiskar iti nakapasamakan ti krimen a tallo a kapsula ti kalibre 45 a paltog kadagiti immunan a napaspasamak a pammaltog ditoy ciudad.
Nupay kasta, kuna ni Baltazar nga agpapan maisursurat daytoy a damag ket awan pay ti resulta na.
Mainaig iti daytoy, inpalgak ni Baltazar a basar iti assessment da ket propesyonal dagiti nangipatungpal iti krimen ken possible a plinano da a naimbag ti panangpatay da ken ni Rara.
Innayon na nga adda ti Closed-circuit television (CCTV) camera a nakatutuk iti nakapasamakan ti krimen nga inmontar iti barangay ngem perdi perdi daytoy.
Gapu iti daytoy, kuna ni Baltazar nga agsubli danto manen iti lugar tapno amwen no adda pay ti sabali a Closed-circuit television iti asideg ti nakapasamakan ti krimen a mabalin a makatulong iti imbestigasyon da.
Kabayatanna, nagpanawagan ni Baltazar kadagiti adda ti impormasyon na iti napasamak a krimen a mabalin da nga idanun kadakuada ti ammo da babaen ti panagtext or panagtawag da a saane a kasapulan nga agpabigbig da pay.
Kuna na pay a mabalin da a tawagan daytoy tapno agkikita da iti maysa a lugar nga isu ti pagsasaritaan da.
