LAOAG CITY – Agtultuloy ti panagbirbiruk dagiti maseknan nga otoridad kadagiti dua a mangngalap a nagpukaw kalpasan a napattog ti nagluganan da a bilog kabayatan ti panagkalap da iti baybay iti ili ti Burgos idi kalman.
Nabigbig dagitoy nga isuda Ryan Quintos, 34 ken ni Ruben Tinaza, 38, agpada a residente iti Barangay Ablan iti nasao nga ili.
Inbatad ni Mr. Marcel Tabije iti Provincial Disaster Risk Reduction and Management Office (PDRRMO) ditoy Ilocos Norte nga immayen timmulong dagiti kameng ti Philippine Navy ken Air force tapno al-alisto a mabirukan dagiti nasao a mangngalap.
Immunan a napan nagbiruk dagiti kameng ti Philippine Coastguard ken Municipal Disaster Risk Reduction and Management Office (MDRRMC) iti ili ti Burgos.
Inlawlawag ni Tabije a basar iti dimmanon kadakuada nga impormasyon, kabayatan ti kaadda dagiti mangngalap iti tengnga ti baybay ket kellaat a dimmakkel ti dalluyon a nagresulta ti pannakaipattog ti nagluganan da a bangka.
Innayon ni Tabije a nakatawag pay laeng ti maysa kadagiti mangngalap iti pamilya na tapno ipakaammo na ti napasamak kadakuada.
