LAOAG CITY – Naiget a naglikudan ni Dr. Sheryl Laguatan iti Piddig District Hospital iti ili ti Piddig ti alegasyon nga adda ti maysa a pasyente a maipagarop a saan da a tinaming no sadinno a pimmusay kabayatan iti pannakaiyakar na iti sabali nga ospital.
Maipalagip nga iti immuna a naidanun a reklamo iti Bombo Radyo Laoag ket naitaray ti pasyente iti Piddig District Hospital iti oras ti alas-tres ti parbangon ngem maipagarop a saan a tinaming dagiti personnel iti nasao nga ospital.
Rumrumuar pay a saan a naiyakar a dagus ti pasyente gapu ta ti ambulansya iti ospital ket maipagarop nga addan ti immuna a nagpareserba.
Inadmitir ni Dr. Laguatan nga isuna ti nakaduty iti dayta a gudaway ken adda ti naitaray a pasyente idi parbangon iti Abril 16 ita a tawen ken trinatar da a dagus daytoy.
Kuna na pay a saan da a naiyakar iti dakkel nga ospital gapu ta maipagarop a nagawid iti kabigatan na ti pasyente ken awan ti inpan da iti ospital iti ciudad ti Batac a pimmusay.
Inpasingked ni Dr. Laguatan nga amin a mapan iti Emergecy Room (ER) ket rumbeng laeng nga asikaswen da a dagus.
Innayon na a sakbay a maiyakar ti pasyente ket masapol a tamingen da nga umuna gapu ta damagen iti pakaiyakaran na nga ospital no ania ti inaramid wenno inpakat da nga agas iti
Kabayatanna, inpetteng ni Dra. Chona Stella Rabang, ti mangidadaulo iti Piddig District Hospital iti ili ti Piddig nga awan ti ambulansya da iti agdama gapu ta naperdi.
Nupay kasta, kuna na a no adda ti emergency a kasapulan a maiyakar iti sabali nga ospital ket ti ambulansya ti lokal a gobierno ti mausar.
Inpalgak na pay a saan a mabalin nga adda ti agpareserba ti ambulansya gapu ta aniaman nga oras ket kasapulan daytoy.
