LAOAG CITY – Kinondenar ni Atty. Edito Balintona, legal counsel ti maysa kadagiti suspek ti pammalatog a napasamak iti Brgy. Cali iti ili ti Dingras ti proseso ti Philippine National Police (PNP) iti panangtiliwda kadagiti kliyentena.
Segun kenkuana, saan a sinurot ti Philippine National Police ti umno a pannakaarestar gapu ta awan ti nalawag ken positibo a pakabigbigan dagiti suspek, rason a saan a maiyannatop a “warrantless arrest” ti pannakaarestar kadagitoy.
Kinunana a dinakamat ni P/Capt. Roi Manuel Ordonio, Hepe ti Dingras Municipal Police Station bayat iti interviewna nga awan ti aniaman a positibo a pannaka-identify dagiti maakakusaran rason a saan nga agbalin a valid ti hot pursuit.
Inlawlawagna pay a ti “hot pursuit,” kasapulan nga addaan iti sigurado a pakabigbigan ti akusado tapno maibaga a lehitimo ti tignay ti polisia.
Innayon ni Balintona, dinakamat ti hepe a ti laeng tattoo iti ima ken nakamotorsiklo ti nangibasaran da ngem saan a maibaga ti biktima ti eksakto a langana.
Nupay kasta, kunana a kiniddaw na iti hepe nga agbalin a regular proceedings ti kaso dagiti dua gapu ta ag-counter affidavit ti pamayanda ngem maipagarop nga impapilit dagiti polis ti inquest iti nasao a kaso.
Gapu iti daytoy, inpakatna ti kalinteganna ken ti accused babaen ti bileg ti Department of Justice Circular No. 15 July 2024, opportunity for the respondent to invoke his right for preliminary determination wether or not the arrest is valid.
Kabayatanna, iti imbestiagasion ti piskal, napaneknekan nga illegal ti pannakatiliw ti akusado.
Maipalagip a napaltogan ti maysa nga estudiante iti Binaratan Road iti Brgy. Cali iti ili ti Dingras.
Nabigbig ti biktima a ni John Restie Decamos y Mallari, agtawen ti 19, residente ti Sitio Malasin iti Brgy. Lanas iti ili ti Dingras idinto a dagiti dua a suspek ket isuda Shaun Alexis Pillos y Sta Monica, agtawen ti 21, awanan asawa, Physical Therapy student ken RB Nuval y Martin, agtawen ti 26, naasawaan, Sangguniang Bayan Member iti ili ti Marcos nga agpada a residente ti Brgy. Valdez iti ili ti Marcos.
