LAOAG CITY – Addan ti dua a person of interest ti Philippine National Police (PNP) iti pannakapaltu-paltog a nangitunda ti pannakatay ni Konsehal Apolonio Medrano iti ili ti Sarrat.
Daytoy ti inbatad ni Police Major Jephre Taccad, ti pannakangiwat ti Ilocos Norte Police Provincial Office (INPPO).
Nupay kasta, kuna ni Taccad a saan da pay laeng a kayat ti mangipaay ti naan-anay a detalye mainaig iti kinatao dagiti person of interest da gapu ta manarimaan pay laeng ti imbestigasyon.
Ibilang met ni Taccad a dakkel a tulong ti 500 a ribo a pisos nga indiaya a gunguna ni Mayor Remigio Medrano iti ili ti Sarrat para iti siasinno man a makaitudo iti adda iti likudan ti pannakapapatay ni Konsehal Medrano.
Mainaig iti daytoy, inpakaammo ni Taccad a nagkiddawen ti dispensar ni Police Major Carlo Abing, ti chief of police iti ili ti Sarrat ken ni Mayor Medrano gapu iti saanna a panagpakada kenkuana idi nagbakasyon.
Inadmitir ni Taccad a nagpakada ni Abing iti provincial director nga agbakasyon ngem ti kamali na ket saan a nagpakada ken ni Mayor Medrano iti ili ti Sarrat.
Naamoan nga awan ni Abing iti ili ti Sarrat idi napaltu-paltugan ni Konsehal Medrano no sadinno a binabalaw ti mayor ken inpetteng na nga arigna mapukpukawen ti panagtalek na iti hepe ti ili da.
Immunan nga inpalgak pay ti mayor a no adda koma dagiti agbanbantay a kameng ti pulisya iti flag raising ceremony iti ili ti Sarrat ket possible a saan koma a napasamak ti pammaltog.
Nupay kasta, inkalintegan ni Taccad nga adda dagiti kameng ti pulisya a napan nagatendar iti flag raising ceremony ngem pimmanaw da kalpasan iti daytoy iti baet a saan pay a nakastrek amin nga empleado.
Innayon ni Taccad a naamoan da a nakastreken iti munisipyo ni Konsehal Medrano idi pimmanaw dagiti kameng ti pulisya ngem kalpasan ti sumagmamano a minutos ket rimuar a napan iti lugan na nga isu metten ti pannakapalto-paltog na.
Kabayatanna, inpasingked ni Taccad a dagiti person of interest da iti pannakapapatay ni Konsehal Medrano ket saan nga isuda dagiti napilaan ti kaso iti napasamak a pammaltog iti ili ti Solsona, sabali met iti ili ti San Nicolas.
Saan pay a maibaga ni Taccad no adda ti pannakainaig na iti pulitika ti pannakapaltu-paltog ni Konsehal Medrano gapu ta manarimaan pay laeng iti mbestigasyon da ken masapol a kitaen da amin a mabalin nga anggulo iti krimen.
