LAOAG CITY – Adda ti dua a motibo nga ikonkonsiderar ti Philippine National Police (PNP) iti pannakapapatay ni Police Staff Sergeant Jackson Raymundo iti ili ti Dingras.
Daytoy ti inbatad ni Police Lt. Col. Roger Digmayo, ti Deputy Provincial Director For Operation iti Ilocos Norte Police Provincial Office (INPPO).
Segun ken ni Digmayo, maysa kadagiti motibo nga ikonkonsiderar da ket ti trabaho ni Raymundo kas maysa a pulis.
Malaksid iti daytoy, inpakaammo ni Digmayo nga addan ti person of interest da ngem nagkedked paylaeng a nangipaay iti dadduma a detalye.
Inbatad na a manarimaan paylaeng ti panagimbestigar da isut gapuna a limitado dagiti mabalin da nga ipublikar nga impormasyon.
Inkari na nga apaman a malpas ti panagimbestigar da ket ipakaammo dati resulta na iti publiko.
Immun-una iti daytoy, nangiparuk-at ti 150 ribo a pisos a gunguna ti Philippine National Police para iti siasinno man a makaitudo ti nangpatay ken ni Raymundo.
Naamoan a ti maipaay a gunguna ket aggapo iti Philippine National Police (PNP), pamilya Raymundo ken dagiti papagayam ti biktima.
Mamati ti Philippine National Police a babaen iti nasao a gunguna ket al-alisto da a mabigbig ti kinatao dagiti suspek.
Ni Jackson ket taga Barangay Puttao iti ili ti Solsona ngem naka-assign iti Philippine National Police iti ili ti Dingras.
Maipalagip a pimmusay ni Raymundo kalpasan a napaltu-paltugan ken naikabil iti compartment ti lugan na.
