LAOAG CITY – Agtultuloy ti imbestigasyon ti Philippine National Police iti ciudad ti Batac iti pannakaubor ti dua a Florida bus iti paset ti Barangay Tabug iti nasao a ciudad.
Daytoy ti inbatad ni Police Lt. Gerome Wangkey, ti chief of police ti ciudad ti Batac.
Segun kenkuana, addan ti person of interest da ngem saan pay a maibilang daytoy a suspek.
Inlawlawag ni Wangkey a ti person of interest da ket addan ti immuna a kaso na a panagbakal ti bus idi 2020.
Nupay kasta, kuna na nga iyur-uray da no adda ti agtestigo tapno mapilaan dan ti kaso ti adda iti likudan ti pannakaubor dagiti dua a bus a nakadangran ti maysa a driver na.
Inrakurak na a natuntun da ti person of interest da babaen kadagiti residente ken adda pay ti naala ti Closed-circuit television (CCTV) a nakamontar iti lugar.
Mainaig iti daytoy, kuna ni Wangkey nga adda ti dashcam ti maysa a bus ngem saan nga agop-operar idinto a ti maysa ket nasipnget iti lugar rason nga awan ti na-capture ti camera na.
Kabayatanna, inbalakad ti chief of police iti publiko a no adda ti problema da kadagiti bus driver ket agturong da laeng iti opisina da tapno agreklamo, saan ketdi a bakalen dagitoy gapu ta delikado ken mangitunda ti disgrasya a possible a pakairisgoan dagiti nakalugan.
Immuna iti daytoy, inpakaammo ni Mr. Willy Florida iti Florida Bus Company a dagiti naubor ket ti Bus 108 a naggapo iti Baguio City ken agturong iti Tuguegarao City kasta pay ti Florida bus GD122 a naggapo iti Manila nga inmaneho ni Jansen Gabriel a residente iti ili ti San Nicolas ken agturong kuma iti Junction Luna Cagayan.
