LAOAG CITY – Inlawlawag ni Police Lt. Col. Adrian Gayuchan, ti chief of police ti Philippine National Police iti ciudad ti Batac a ti panagwangwang ti patrol car da ket no kasapulan.
Seun kenni Gayuchan, aramiden laeng dagitoy dagiti agpatrolya ti rabii agingga iti parbangon no adda dagiti makita da nga agii-inom iti dis-oras ti rabii.
Inpetteng na a saan da nga ar-aramiden daytoy tapno mangitunda ti alarma ken saan da nga intensyon a makaistorbo kadagiti residente.
Inbatad na a saan da met a basta agwangwang nga awan ti makita da a rason ken saan met nga agpaot daytoy.
Nupay kasta, kunana a silulukat ti Philippine National Police iti ciudad ti Batac iti suhestyun para iti pannakaipatungpal ti linak ken talna iti nasao a lugar.
Innayon na nga anyaman a suhestyun a pagsayaatan iti publiko a maidasar intono taripnong da iti intono Pebrero 17 ket isu ti aramiden da.
Ummuna iti daytoy, nagpanawagan ni Sangguniang Panlungsod Member Violeta Nalupta iti Siudad ti Batac iti Philippine National Police iti nasao a Siudad a liklikanda koma a pag-sirenen ti patrolda no awan ti respondeanda nga insidente.
Inlawlawag ni Nalupta a kabayatan ti panag-walking na iti parbangon ket naimatangan na ti arig adda ti emergency a respondean ti patrol ti pulisya iti nasao a ciudad.
Inpetteng ti konsehal nga iti parbangon ket adu pay laeng dagiti matmaturog nga umili ken ti kastoy ar-aramiden dagiti kameng ti pulisya ket makaalarma.
