LAOAG CITY – Naipilan ti kaso a Malicious Mischief kontra iti suspek a nangbakal-bakal iti service vehicle ti National Bureau of Investigation (NBI) iti ciudad ti Batac.
Daytoy ti inbatad ni Police Lt. Col. Adrian Gayuchan, ti chief of police ti Philippine National Police iti nasao a ciudad.
Segun kenni Gayuchan, ti lugan ti National Bureau of Investigation ket naipatarimaan metten.
Maipalagip a tiniliw dagiti kameng ti Philippine National Police ni TJ Oducayen y Lirag, agtawen ti 24, baro, estudyante ken residente iti Barangay 6, San Juan iti nasao a ciudad gapo iti panangbakal na iti lugan ti ahensya.
Ummunan nga inbatad ni Gayuchan a napan nagreport iti opisina da ni Ablezer Rivera y Tagatac, agtawen ti 59, naasawaan, National Bureau of Investigation agent ken residente met laeng iti nadakamat a barangay.
Inbatad na a ti palawag ni Rivera ket napan riniing ti kaanakan na a ni Hope Millare, addaan iti umno a tawen, barangay kagawad iti nadakamat a barangay tapno ipakaammo a bakbakalen ti suspek ti iturturong na a lugan.
Inpalgak ni Rivera a ginandat ti barangay kagawad a lapdan ti suspek ngem intultuloy na latta ti nangbakal iti lugan a nakadadaelan ti sumagmamano a paset ti likudan na.
Inpakaammo ni Gayuchan a mapapati a nakainom ti nasanger ni Oducayen idi napasamak ti insidente.
