LAOAG CITY – Agtultuloy ti imbestigasyon dagiti otoridad mainaig iti pannakatagtagbat a poon ti nakatayan ni Sheryl Ranay y Garcia, agtawen ti 39, addaan ti tallo nga annak, iti mismo a balay na iti Barangay Nagsurot, Burgos, Ilocos Norte
Daytoy ti inbatad ni Police Capt. Sheryl Guzman, ti chief of police iti ili ti Burgos iti eksklusibo nga interview kenkuana ti Bombo Radyo Laoag.
Kinumpirmaran ni Guzman nga addan ti person of interest da ken mangnamnama a makaala da ti testigo tapno al-alisto a masolbar ti kaso.
Nagkedked metten ni Guzman a nanginagan ti dakdakamaten na a person of interest ken awan pay ti naestablisar da a motibo iti krimen gapu ta awan ti karirriri ni Ranay ken ti laeng inaldaw nga aktibidad na ket ti mapan agitulnog ken mangsundo ti anakna iti pagadalan.
Inpakaammo ni Guzman nga iti pananginterview da iti nobyo ni Ranay ket inadmitir na nga idi rabii ti miyerkules ket napan imyan iti balay ti biktima ngem nagawid metlaeng iti oras ti alas-singko ti parbangon ti huwebes.
Nakita pay laeng ti biktima iti oras ti alas-otso ti bigat idinto a naduktalan ti pannakatagtagbat ni Ranay iti oras ti alas-8:20 ti bigat idi kalman.
Kuna pay ni Guzman nga iti panagsalsaludsod da kadagiti karruba ti biktima ket awan pulos ti nadnadlaw da a naidumduma iti balay ni Ranay iti dayta nga oras.
Innayon na nga awan met ti pagilasinan a nakilaban ti biktima ken saan a napwersa a nalukatan ti ridaw wenno tawa ti balay ni Ranay a possible a nagserkan ti suspek.
Immun-una iti daytoy, inbatad ni Police Corporal Mark Briones, imbestigador ti PNP-Burgos a kalpasan a nagsina ti biktima ken ti asawa na ket nakirelasyon iti maysa nga Amerikano.
Nupay kasta, nagsina da iti Amerikano ken iti agdama ket adda ti nobyo na a residente met laeng iti Barangay Nagsurot ken daytoy ti kinarsaritan ti pulisya.
Kinumpirmaran ni Briones a nagsagaba ti biktima ti dua a tagbat iti teltel, ngato ti lapayag ken dua a tagbat iti rupa na.
Basar ken ni Briones, naamoan ti pannakatagtagbat ti biktima kalpasan a napan ti kabsat na iti balay da Ranay tapno mapan na koma buluden ti motorsiklo, ngem awan ti sumungsungbat iti awag na isu a simrek lattan daytoy.
Ditoy a nakita na ti kabsat na iti salas ti balay na a madigdigusen ti bukod na a dara.
Inadmitir ni Briones nga iti agtultuloy nga imbestigasyon da ket naamoan a ti nobyo ni Ranay ket adda met ti dati a pamilya na.
Rumrumuar pay nga iti baet a nagsinan ni Ranay ken ti nakarelasyon na nga Amerikano ket nagtalinaed latta ti komunikasyon da gapu ta kalpasan a naamoan ti gangannaet ti napasamak babaen ti anak ti biktima ket timmawag a dagus daytoy iti nailian a pulisya.
