LAOAG CITY – Inlawlawag ni Police Major Arnel Tabaog, chief of police ti PNP-Banna no anya ti namunganayan ti panagtinnagbat dagiti dua a lallaki idiay Barangay Binacag iti nasao nga ili.
Segun kenni Tabaog, adda ti dati a riri ti biktima a ni Jayson Benito, 36, naasawaan ken ti suspek ket ni Joefrey Juan, 37, addaan ti live in partner ken agpada da a residente iti nasao a barangay gapo iti napasamak kadakuada iti napalabas nga aldaw.
Ummuna iti daytoy, nagtulag dagiti dua a mapan idiay Nueva Era, ken dimmagas da iti tianggi tapno uminom ti arak ngem gapo iti kinabartek ni Juan ket dinadael na ti motorsiklo ni Benito rason a nagpungtot met ti biktima.
Naamoan nga idi nagawid ni Benito ket innala ken inlemmeng na ti ligay ti kuliglig ni Juan a rason ti panagpungtot na ken binirbirok ti suspek ti biktima ngem napaay.
Inbatad ni Tabaog nga idi nasiputan ni Juan a napan iti CR ni Benito ket inuray na ken idi rumwaren ket pinaltogan na ti akin-kannigid a saka ti biktima usar ti airgun rason a napan met nangala ti kutsilyo ken kinamat na ti suspek agingga a nakadanon da iti puon ti balete.
Kunana a ditoy binagkong ti biktima ti takyag ti suspek ken bimmales met daytoy ken tinagbat na ti puon ti lapayag ti biktima.
Iti imbestigasyon da, kuna ni Tabaog a basar kapitan ti barangay ket addan ti rekord dagiti dua ken nakumpirmaran a kuriro dagitoy nangruna no makainom da.
Mainaig iti daytoy, kuna ni Tabaog nga stable ita ti kasasaad ti biktima ken ti suspek.
Iti agdama ket nakasaganan ti kaso a frustrated homicide kontra kenni Juan.
