LAOAG CITY – Inbatad ni Police Major Kristian Lee Badua, ti chief of police iti ili ti Piddig nga ikarigatan da nga ipila ita nga aldaw ti kaso a 2 counts of murder ken panaglabsing iti Republic Act No. 10591 wenno ti Illegal Possession of Firearms kontra iti suspek ti pammaltog a nakatayan dagiti agina iti Barangay San Antonio iti nasao nga ili.
Nabigbig dagiti biktima nga isuda Maria Theresa Dansalan, agtawen ti 55 ken ti anakna a ni Jasper Dansalan, agtawen ti 27, pharmacist ken residente dagitoy iti Barangay Nalasin iti ili ti Solsona idinto a ti suspek ket nabigbig a ni Rodel Donato, agtawen ti 37, addaan ti live-in-partner, security guard ken residente iti Barangay Poblacion, Lapaz, Abra.
Segun kenkuana, inadmitir ti suspek nga adda ti impluwensya ti nasanger idi aramiden na ti krimen ken nabayag na a pinanunot wenno plinano no kasanu na nga ipatungpal ti dakes a panggep na.
Inpakaammo ni Badua a basar iti agtultuloy nga imbestigasyon da ket naamoan da a nagdesisyon ti live-in partner ti suspek a nakisina gapu iti kanayun a panagin-inom ti lalaki ken ti panangdangdangran kenkuana.
Immuna iti daytoy, kuna ni Badua a kabayatan a dumaldalyasat ti kurong-kurong nga inturong ni Rick Garcia, agtawen ti 52, naasawaan, mannalon ken residente iti Barangay Nalasin iti ili ti Solsona kaduana dagiti agina pakairamanan ti dua pay a menor de edad ket sinaruno ken pinagsardeng isuda ti suspek kalpasan na ket kellaat na lattan a pinaltu-paltogan dagiti biktima a nangitunda ti pannakatayda.
Inrakurak ni Badua a kabayatan ti panagpatrolya dagiti kameng ti pulisya iti asideg ti nakapasamakan ti krimen ket nakita da ti nakamotorsiklo a nakaiggem ti paltog isut gapuna a pinagsardeng da daytoy no sadinno nga iti dayta a gundaway ket immasideg kadakuada ni Garcia tapno ipakaammo ti panangpalto-paltog ti suspek kadagiti agina isut gapuna nga inarestar a dagus daytoy dagiti otoridad.
Nakumpiskar dagiti otoridad iti ikot ti suspek ti calibre 45 a paltog nga addaan ti maysa a bala manipod iti suspek idinto a narekobre da met iti nakapasamakan ti krimen ti lima a cartridge cases ti calibre 45, maysa nga slug ti isu metlaeng a paltog ken maysa a magazine.
Iti agdama, nagtalinaed ti suspek iti Philippine National Police iti ili ti Piddig.
