LAOAG CITY – Kiddawen ti Philippine National Police (PNP) a ma-otopsiya ti bangkay ni JR Galapon, 35, awanan asawa ken residente iti Brgy. 21 iti ili ti Sarrat.
Daytoy ti inbatad ni Police Staff Sergeant Dennis Esteban, imbestigador iti PNP iti nasao nga ili.
Immuna iti daytoy, bayat nga aggi-inom da Galapon iti balay ti suspek a ni Leo Mariano, 35, naasawaan, tricycle driver ken residente iti Brgy. 20 iti met laeng nasao nga ili ket adda ti nagririan da.
Kuna ni Esteban a napan naganawa dagiti nagannak ni Mariano ngem inungtan ti suspek dagitoy gapu ta saanna a kayat ti panangkanunung da iti biktima.
Kalpasan ti sumagmamano a gundaway, immadayo ti biktima ken suspek iti paggiinuman da ket ditoy nga intuloy da ti nagsisinnungbat ken dinanug ti suspek ti rupa ti biktima.
Gapu iti panangdanug ti suspek ken ni Galapon ket natumba iti semento ken saanen a nakatakder pay.
Insigida a naitaray ni Galapon iti Gov. Roque Ablan Sr. Memorial Hospital ngem naideklara a pimmusay.
Inpakaammo ni Esteban nga adda dagiti mangibagbaga nga adda ti sakit ni Galapon ngem naglikudan daytoy dagiti nagannak na.
Gapu iti daytoy, kuna ni Esteban a kiddawen da a maotopsya ti bangkay ti biktima tapno maamoan no ania ti pudno a nakatayan na.
Kabayatanna, inbatad ni Esteban a sakbay ti krimen ket binagbagaan ti biktima ti suspek mainaig ti panagrayrayo na iti maysa a menor de edad.
Nagtalinaed ti suspek iti kustodyar ti pulisya ken nagkedkeden a nagpainterview iti Bombo Radyo.
