LAOAG CITY – Agtultuloy pay laeng ti imbestigasyon dagiti otoridad iti pammaltog iti Barangay Sta. Rosa ditoy ciudad ti Laoag a nakairamanan ti pulis nga addaan ti ranggo a Police Staff Sergent.
Daytoy ti inbatad ni Police Captain Rogelyn Ibe, ti Deputy Chief of Police ti Philippine National Police ditoy ciudad ti Laoag.
Segun kenni Ibe, kabayatan ti imbestigasyon da ket restricted met ti nakadamat a karaman a pulis.
Inbatad na a no adda ti makita na a nagliwayan ti nagresponde a pulis ket mapilaan ti kaso administratibo.
Kuna ni Ibe nga iti inisyal nga imbestigasyon da ket ada ti uppat a pulis nga ummuna a napan nagresponde ti panagprobokar ti biktima a ni Roderick Sebastian ken nagpatulong da pay kadagiti kakadwa da pakairamanan ti Police Staff Sergeant gapo ta saan da a maanawa ti maseknan.
Inlawlawag na a naggubal ti pulis ken biktima sumagmamano a daras a ginandat pay ti maseknan a bagkongen ti pulis agingga a pinaltogan na daytoy.
Innayon na nga apaman a malpas da ti imbestigasyon da ket isubmitir da ti resulta iti Ilocos Norte Police Provincial Office ken uray ti Internal Affairs Service ket manarimaan met ti imbestigasyon na.
Kabayatanna, saan pay a dimmatag iti pulisya ti pamilya ti biktima no ania ti plano da iti daytoy.
