LAOAG CITY – Inpakaamo ni PLt. Col. Joseph Baltazar, ti hepe iti Philippine National Police ditoy siudad ti Laoag a makikoordenar da iti Bangko Sentral ng Pilipinas tapno maberipikar a nasayaat ti peke a kwarta a naibayad iti maysa nga aglaklako iti merkado publiko ditoy siudad ti Laoag.
Inbatad na a babaen iti pannakaikoordenar da iti Bangko Sentral ng Pilipinas ket maamoan nu maikkan ti sertipikasyon ti kwarta kas peke.
Immuna iti daytoy, kuna ni Baltazar nga innem a 500 peso bill ti naala manipod iti aglaklako a baket wenno kaibatugan ti 3,000 a pisos.
Kuna na nga iti agdama ket naan-anay nga imbestigaren ti kapulisan ti maseknan aglaklako tapno maamoan nu pudno a saan a naggapo kenkuana ti peke a kwarta.
Innayun na nga ammoen da pay nu adda dagiti grupo nga agiwarwaras ti peke a kwarta ditoy probinsya.
