LAOAG CITY – Agtultuloy ti naun-uneg nga imbestigasion iti napasamak a pammaltog a nakatayan ti maysa a lalaki a ni Andres Tungpalan Daquioag, agtawen ti 59, addaan ti live-in partner ken residente ti Brgy. 19 ditoy siudad ti Laoag.
Basar iti Laoag City Police Station, adda ti naiyuswat a bachelor party ti biktima idi rabii kas paset iti panagsagsagana ti panagkasarna ita nga aldaw, Disiembre 18.
Maibasar iti imbestigasion dagiti otoridad, kalpasan ti nasao a bachelor party ket ti pagaammo ti kabsat ti biktima ket napan naturogen ti kabsatna ken ti ka-live in partner daytoy.
Nupay kasta, naammoan a nagturong ti biktima ken ti ka-live in partner-na iti convenience store nga isu metten ti nakapasamakan ti insidente.
Kinumpirmaran dagiti otoridad nga awan ti kinapudnona ti rumrummuar nga adda ti nakasinnungbat ti biktima sakbay ti pammaltog.
Mainaig iti daytoy, segun iti ka-live in partner ti biktima ket adda ti maysa nga indibidual a posible nga adda iti likudan iti napasamak a pammaltog.
Maipalagip a natay ti biktima kalpasan a napaltu-paltogan iti likud ti ulona iti namindua a daras iti Brgy. 5, San Pedro ditoy siudad ti Laoag.
Immuna iti daytoy, narekobre dagiti otoridad ti dua a kapsula ti bala ti paltog a maipagarup a Caliber .45.
Iti agdama, agtultuloy ti panangiwayat dagiti otoridad ti pannakatiliw ken pannakabigbig ti suspek iti nasao a pammaltog.
