LAOAG CITY – Inbatad ni PLt. Col Joseph Baltazar, Hepe ti Philippine National Police ditoy siudad ti Laoag nga addan dagiti motibo a sursuroten dagiti kameng ti Philippine National Police mainaig iti pammaltog a napasamak iti Barangay 43, Cavit ditoy siudad.
Nupay kasta, nagkedked pay laeng nga irakurak dagiti motibo a sursurotenda bayat ti agtultuloy a panagimbestigar dagiti kameng ti pulisya iti pannakapapatay ni Josephine Rara nga agtawen ti 43, residente ti nasao a lugar.
Segun ken ni Baltazar, agdama nga irevreview da dagiti CCTV footages iti nasao a lugar tapno makita dagiti posible a nagturungan dagiti saan pay a nabigbig a suspek.
Inbatadna a kasapulan a maikkan ti hustisya ti pannakapapatay ti biktima gapu ta daytoy ket maysa a babai a napalto-paltogan iti mismo a pagtaenganna.
Ginutigot pay ni Baltazar iti pamilya ti biktima a makitinnulong da iti imbestigasyon tapno al-listo ti maiyus-uswat nga imbestigasyon.
Maipalagip a natay ni Josephine Rara kalpasan a napalto-paltogan iti pagtaenganda iti Brgy. 43, Cavit ditoy siudad ti Laoag.
