LAOAG CITY – Linawlawagan ni SPO3 Harold Nicolas iti intelligence division iti PNP-Laoag ti nagbalin nga alegasyon ni Rocky Baloan, ti sucject ti drug buy bust operation idiay Barangay Rioeng ditoy ciudad ti Laoag.
Segun kenni Nicolas, ti nakalugan iti motorsiklo a Mio ket ti police buyer ken police asset ken ti alegasyon na a nakabil ket saan a pudno gapo ta limmaban ken timmaray.
Inbatad na a nagtaray met ti kadwa ni Baloan isut gapo na a nagudwa ti tropa a rason a naggugulo iti tengnga ti kalsada.
Kunana a kanayun a mangmangegan da a naimula dagiti makumkumpiskar a droga kadagiti matiltilwan a subject ti operasyon ken awan ti pangalaan da ti droga nga imula da kas iti akusasyon ni Balaon.
Naamoan nga umabot ti 15 a ribo a pisos ti balor dagiti nakumpiskar a droga manipud kenni Baloan ken agop-operar daytoy ditoy ciudad ti Laoag ken iti ili ti Sarrat ken San Nicolas, ken adda ti koneksyon na kadagiti ummunan a natiliw.
Innayon na nga iti sentro ti Laoag kuma ti pakaiyuswatan ti operasyon ngem kellaat a nagbaliw ti instruction ni Baloan iti police asset nga iti laengen Laoag-Sarrat road gapo ta agawiden ti subject.
