LAOAG CITY – Addan ti pannakaiyuswat ti naun-uneg nga imbestigasyon iti pannakapalto-paltog a nakatayan dagiti dua nga indibidual iti bypass road iti Brgy. Madamba iti ili ti Dingras.
Daytoy ti inpakaammo ni PMaj. Julius Basallo, hepe ti PNP iti ili ti Dingras.
Kuna ni Basallo nga iti agdama ket makitkita dagiti amin nga anggulo iti krimen a nakatayan da Keith Dhenelle Garabiles, agtawen ti 32, kameng ti Civil Security Unit ken residente iti Barangay Guerrero ken ni Manilyn Marcelino, agtawen ti 49.
Inbatad na a ti patta-patta da a nausar a paltog iti caliber 9mm basar iti nagbalin nga inspeksyon ti crime operatives.
Innayun na nga adda pay ti nakita a tallo a cellphone nga isu ti maisubmitir iti regional anti-crime cyber unit tapno maamoan nu adda dagiti mabalin nga ebidensya.
Kabayatanna, kuna na a saan a masinunuo ti eksakto nga oras a napasamak ti krimen.
Immuna iti daytoy, inpakaammo ni Basallo naipadalan iti post mortem examination ti bangkay dagiti biktima tapno maamoan nu adda ti dadduma a tama ti paltog iti nagduduma a paset ti bagi da wenno aniaman a sugat a mabalin a sinagaba dagiti biktima.
Innayun ni Basallo a saan na pay a makumpirmaran ni adda ti relasyon dagiti biktima.
Maipalagip a naduktalan a nadigos iti bukod a dara ken agpada nga awanen ti anges bayat nga adda iti uneg ti kotse dagiti biktima.
Iti inisyal nga eksaminasyon kadagitoy, nagbasagaba ti uppat a tama ti paltog ni Garabiles idinto nga uppat met ken ni Marcelino.
