LAOAG CITY – Inbatad ni Police Lt. Roi Manuel Ordonio, ti baro a chief of police iti ili ti Pasuquin a saan a nagkurang a nangiplastar kadagiti affidavit ken ebidensya iti panangipila da ti reklamo kontra kadagiti pito a babbai a natiliw a nagsusugal partikular iti ay-ayam a “colcol” iti nasao nga ili.
Nupay kasta, inbaga na a saan a napnek ti piskalya isut gapuna nga inbasura da ti inpila da a reklamo kontra kadagiti maseknan.
Inbaga na a ti palawag ti piskalya ket nagkurang da ti pammaneknek no personal a kwarta wenno taya dagiti maseknan ti nakumpiskar da iti lugar.
Mainaig iti daytoy, inpasingked ni Ordonio nga awan pay ti nakasarsarita na nga opisyal iti nasao nga ili mainaig iti nasao a kaso.
Inlawlawag na a katugtugaw na laeng kas baro nga hepe iti nasao nga ili idi aldaw ti biernes isut gapuna nga awan pay ti am-ammo na nga opisyal iti lugar.
Sungbat daytoy ni Ordonio kalpasan nga adda ti alegasyon a naidanun iti Bombo Radyo Laoag a maipagarop a napan nakisarita iti PNP ni Local Chief Executive Secretary Rex Aguinaldo.
Rumrumuar pay a napasuksukan ti 100 a ribo a pisos ni Ordonio tapno saan na nga iplastar a naimbag ti inpila da a reklamo kontra kadagiti natiliw a pito a nagsusugal iti nasao nga ili.
Kinatawaan laeng daytoy ni Ordonio no sadinno nga inbaga na nga iti kinaubing na pay iti serbisyo ket saanna a maaramid ti agawat ti pasuksuk.
Gapu iti daytoy, inbaga ni Ordonio a plano da ti agpila ti motion for reconsideration mainaig iti pannakaibasura ti inpila da a reklamo iti piskalya.
Kabayatanna, inadmitir ni Aguinaldo a napan idi iti PNP-Pasuquin iti pannakatiliw dagiti pito a babbai gapu ta am-ammo na dagitoy ken kayat na a makita ti sitwasyon da ken matulungan dagitoy no agmulta wenno agpiyansa da.
Naglikudan met ni Aguinaldo a nakisarita iti hepe ti pulisya ken siasinno man nga indibidual tapno maibasura ti reklamo kontra kadagiti natiliw a pito a babbai.
