LAOAG CITY – Nagballaag ni Police Major Paul Benedict Parado, ti chief of police iti ili a San Nicolas a pilaan da ti reklamo nga obstruction of justice ti Ilocos Norte Electric Cooperative (INEC) no saanda pay laeng a makikooperar kadakuada.
Daytoy ket mainaig pay laeng iti pannakatay dagiti dua a lineman a da Talio Portela, taga Brgy. 9, kenni Marcon Domion a taga Brgy. 6 iti nasao nga ili, agpada a lineman iti Zone 6 ti INEC.
Iti eksklusibo nga interview ti Bombo Radyo Laoag ken ni Parado, inbatad na a saanda a mabukel ti imbestigasyon agingga a saanda a maala ti resulta ti imbestigasyon ti Fact-finding Committee a binukel ti kooperatiba.
Inpetteng na a namin-adon a naitantan ti pannakaipaay kadakuada ti resulta ti imbestigasyon ti komite ken uray ti kopya ti pinapirmaan da a sworn affidavit kadagiti dadduma a kameng ti INEC ket saan pay a naisubli kadakuada.
Saan a maawatan ni Parado no apay nga ibaybayag ti INEC ti dawdawaten da a dokumento tapno malpas koman ti imbestigasyon da.
Innayon ni Parado a ti laeng kalikagom ket maamoan no siasinno dagiti adda ti nagkurangan na iti napasamak.
Immuna ti daytoy, inrakurak ti INEC a saan nga iti mismo a sub-station da iti Barangay Payas iti ili ti San Nicolas ti naggapoan ti kuryente a nakatayan dagiti dua a lineman ti nasao a kooperatiba.
