LAOAG CITY – Inbatad ni Police Capt. Chris Anthony Sorsano, ti chief of police iti ili ti Solsona a saan da pay a maibaga no adda ti foul play iti pannakatay ni Rowell Gallegos a taga Barangay Manalpac iti nasao nga ili.
Daytoy ket iti baet nga adda dagiti nakita da a nagmarka a dara, 300-350 a metro ti kaadayo na manipod iti bangkay ni Gallegos.
Inlawlawag ni Sorsano a masapol nga ipadalan da pay laeng ti DNA test ti dara ken no agpositibo daytoy ket maibilang nga adda ti foul play iti napasamak.
Kuna pay ni Sorsano nga uray ti cellphone ni Gallegos ket paimbestigar da iti Anti-Cyber Crime Group tapno maamoan no siasinno dagiti naudi a nakasarita ti biktima.
Innayon na a no bilang makumpirmaran da nga adda ti foul play iti pannakatay ni Gallegos ket addan ti persons of interest da ngem saanna pay laeng a mabalin nga ipublikar.
Innayon na a kitaen da amin a possible nga anggulo ti napasamak, pakairamanan ti kaso a rape ti nasao a biktima.
Maipalagip a nagpukaw idi Pebrero 5 ita a tawen ti biktima ken kalpasan ti sumagmamano a lawas ket nabirukan ti agruprupsan a bangkay na iti derraas iti Apayao Road.
Immunan a nagpakada ti biktima a mapan idiay Butao, Apayao tapno dalusan na ti pagmulaan na ti pagay babaen ti panaglugan na ti binulud na a motorsiklo.
