LAOAG CITY – Inrakurak ni Police Major Eli Christian Conrado iti Philippine National Police Drug Enforcement Group – Special Operations Unit 1 ti pannakadismaya na iti pannakairamraman dagiti opisyal ti barangay ken Sang Kabataan iti illegal a droga.
Daytoy ket kalpasan ti pannakaarestar da iti maysa a SK kagawad a nabigbig a ni Regiemar Pagadan, residente iti Barangay 23 iti ili ti San Nicolas kalpasan a naglako ti maipagarop a shabu ken nakumpiskar da pay kenkuana ti uppat a sachet a naglaon metlaeng ti maatap nga illegal a droga.
Segun ken ni Conrado, basar kadagiti makalkalap da nga intelligence report ket saggabassit laeng ti ilaklako ti suspek a shabu ken kasta met ti marijuana.
Kuna pay ni Major Conrado a maibilang ti suspek kas High Value Indibidual gapu ta daytoy ket maysa a naelektaran nga opisyal ti gobierno.
Innayon na a nalawan ti masakupan ti operasyon ti nasao a suspek.
