LAOAG CITY – Inbatad ni Police Captain Carlo Abing, ti chief of police ti PNP-Sarrat a manarimaan ti preliminary investigation iti napasamak a pammaltog itay kallabes iti paset ti Barangay 22, San Cristobal iti nasao nga ili.
Segun kenni Abing, urayen da laeng ti resulta ti inyuswat ti piskalya nga imbestigasyon mainaig iti daytoy.
Malaksid iti daytoy, ur-urayen da ti pulisya iti nasao nga ili ti resulta ti pannakaberipikar ti paltog a nausar manipud iti Camp Crame.
Maipalagip a nagprob-probokar ti biktima iti balay ti suspek gapu ta maipagarop a saanna a maawat ti panangisina kenkuana ti nobya na a kabsat ni Ganotisi.
Kuna na nga idi inanawa ti suspek ket nagawid ti biktima, ngem saanda a ninamnama nga agsubli daytoy ken intuloy na manen ti nagprobokar ken inpilit na pay ti sumrek iti uneg ti balay ti suspek.
Gapu iti daytoy, napan manen inanawa ti suspek ngem maipagarop a ditoyen a nagsinsinnungbat dagiti dua agingga nga inasut ti biktima ti paltog na a maysa a magnum 357.
Nakita ti suspek ti paltog isut gapuna a nagin-innagaw da iti biktima agingga nga aksidente a nakalbit ni Ganotisi ti gatilyo ti paltog a nakatamaan ti bagi ken abaga ni Pangalan a nangitunda ti ipupusay na.
