LAOAG CITY – Inkari ni Provincial Jail Warden Benilda Sadian a saanda nga agsardeng agingga a saan da a mabirukan ken maisubli iti Ilocos Norte Provincial Jail (INPJ) ti naglibas a balud a ni Medy Laudencia, taga Barangay Suyo iti ili ti Dingras ken sumangsango ti kaso a panagrames.
Inbatad na a nangipatulod da ti nayun dagiti kakadwa da nga immunan a napan idiay La Union tapno mapan da biruken ni Laudencia.
Innayon ni Sadian a nagpatulong da payen iti Police Regional Office babaen ken ni Police Lt. Col. Dominic Guerrero a naka-assign iti nadakamat a lugar.
Immun-una iti daytoy, nangidiaya ti INPJ ti 20 ribo a pisos a gunguna para iti siasinno man a makaibaga iti ayan ni Laudencia.
Maipalagip nga idi sabado, Agosto 30 ket naglibas ni Laudencia kabayatan a napigsa ti tudo babaen ti pannagna na iti tinubtub na nga alad ti nasao a pagbaludan.
