LAOAG CITY – Nakaruaren iti Mariano Marcos Memorial Hospital and Medical Center iti Siudad ti Batac ti agtawen ti 35 a lalaki a nagbalin a Person’s Under Investigation kalpasan a nag-negatibo iti Corona Virus Disease wenno CoViD 19.
Daytoy ti inpakaammo ni Dr. Sheryl Racelis, Medical Specialist II iti nasao nga ospital.
Segun kenkuana, addaanda ti capacity building lodge kadagiti maibilang a Level 2 ken Level 3 Hospital a kas mandar ti Department of Health a masapol a nakasaganada a mangtaming kadagiti agbalin a pasiente ti COVID-19.
Inbatadna a gapu ta agkurang ti Personal Protection Equipment wenno PPE ti Governor Roque Ablan Senior Memorial Hospital, nangitedda ti 50 sets a PPE idinto a 20 sets a PPE ti inpaayda iti Laoag City General Hospital.
Inpalagipna a ti nagbalin a PUI ket napan na binisita ti asawa na idiay Hong Kong ngem inbaga ti Bureau of Quarantine a dumalan daytoy ti Home Quarantine.
Innayon na nga iti maika-11 nga aldaw sipud nagself-quarantine ket nagpasar kadagiti sintomas ti covid-19 kas ti uyek isut gapuna nga inkabil da daytoy iti MMMH & MC.
