LAOAG CITY – Inbatad ni Provincial Director Police Col. Frederick Obar nga iyur-uray da paylaeng ti resulta ti eksaminasyon ti maysa a pulis a nadisgrasya iti paset ti Barangay 23 iti ili ti Sarrat tapno maamoan no daytoy ket positibo a nakainom ti nasanger wenno saan.
Segun ken ni Obar, no bilang mapaneknekan a nakainom ti nasanger ti saan pay a nabigbig a kameng ti pulisya ket ipatungpal da ti disciplinary mechanism.
Inpetteng ni Obar a nakaduty man wenno saan dagiti kameng ti pulisya ket masapol a suruten da latta ti administrative policies.
Mainaig iti daytoy, inlawlawag ni Police Major Juan, ti legal officer ti Ilocos Norte Police Provincial Office a ti reklamo nga ipila da iti nadisgrasya a pulis ket maibasar iti report kadakuada.
Kuna na a no mapaneknekan a nakainom ti nasanger ket pilaan da ti Anti-Drunk Driving Act, sabali pay ti reklamo a maipila no adda dagiti nadadael na gapu iti pannakadisgrasya na ken possible a sumango pay ti neglect of duty.
Nupay kasta, inrakurak ni Juan nga adda ti sursuruten da a procedure no sadinno nga ikkan da ti oras ken naan-anay a panawen ti maseknan a pulis tapno sungbatan na ti alegasyon kontra kenkuana.
Maipalagip a nagsagaba ti sugat iti nagduduma a paset ti saan pay a nainaganan a kameng ti pulisya kalpasan a naidungpar iti alad ti minaneho na a kotse ken nairaman pay a nadungpar na ti tallo a poon ti marunggay ken maysa a kurung-kurong.
Rumrumuar a ti nasao a pulis ket maipagarop a nakainom ti arak idi napasamak ti insidente.
