LAOAG CITY – Inpakaammo ni PMaj. Jeffre Taccad, ti pannakangiwat ti Ilocos Norte Police Provincial Office (INPPO) nga adda ti direktiba ni Provincial Director PCol. Christopher Abrahano a mapilaan ti kaso administratibo ti pulis a karaman iti napasamak a desgrasya iti national highway a paset ti Barangay 13 ditoy ciudad.
Kuna ni Taccad a daytoy ket iti laksid nga inbabawi dagiti tallo a biktima ti desgrasya ti maipila koma a kaso iti pulis a binigbig na a ni Police Senior MSgt. Jason Pacis gapu iti panangibaklay daytoy ti gastos iti ospital dagiti maseknan.
Segun ken ni Taccad, kangrunaan a rason tapno maituloy ti kaso administratibo a maipila kenni Pacis ket gapu iti kaadda na iti impluwensya ti nasanger idi napasamak ti insidente.
Innayun na a malaksid iti pannakaipila ti kaso adminstratibo kenni Pacis ket posible a ma-dismiss wenno maidemote nu mapaneknekan a naginom daytoy iti mismo a kampo wenno stasyon ti pulisya.
Kuna ni Taccad a maiyuswat ti naun-uneg nga imbestigasyon kenni Pacis partikular iti desgrasya a nakaibilanganna.
Maipalagip a nadungpar ti kotse ni Pacis dagiti tallo nga indibidual a naglulubbon iti motorsiklo bayat nga agpapaamyanan a direksyon ken agawid koma iti ili ti Vintar.
Nagsagaba ti sugat kangrunaan na iti saka dagiti naglugan iti motorsiklo ken naitarayda iti Governor Roque Ablan Senior Memorial Hospital (GRASMH) idinto a saan a nadangran ti pulis.
Mainaig iti daytoy, naamoan pay basar iti inisyal nga imbestigasyon ti PNP ditoy siudad ket rumrumuar a ti kotse ti immagaw ti linya dagiti nakamotorsiklo.
Immun-una metten nga inpakaammo ni Taccad nga adda dagiti kaso administratibo ken criminal case a sinango ni Pacis iti kallabes partikular iti ili ti Vintar ken Bacarra ngem nasolbar met laeng dagitoy.
Nagpalagip ti opisyal kadagiti kakadwana iti kapulisan a suruten dagiti linteg ti kapulisan tapno saan a maperdi ti imahe da.
