LAOAG CITY – Inbatad ni Police Major Jephre Taccad, ti pannakangiwat ti Ilocos Norte Police Provincial Office (INPPO) a naipilan ti kaso nga illegal discharge of fire arm ken attempted homicide kontra kenni Police Chief Master Sergeant (PCMS) Francis Pailma a kameng ti Regional Civil Security Unit 1 ken residente iti Brgy. 1 iti ili ti Vintar.
Kuna pay ni Taccad a manarimaan ti panagimbestigar ti Internal Affairs Service (IAS) para iti kaso administratibo kontra ken ni Pailma.
Mainaig iti daytoy, inbatad ni Taccad a rebbeng na laeng a mapilaan ti kaso kriminal ken kaso administratibo ni Pailma gapu ta nagpaputok ti paltog.
Inpalgak ni Taccad a saan a kanunungan ni Provincial Director Christoper Abrahano dagiti pulis nga agar aramid ti illegal nga aktibidad kangrunaan na ti panagpaputok ti paltog.
Innayon na nga inpetteng ti provincial director nga aniaman ti pagbasolan ti maysa a pulis ket nasken a sungbatan na.
Maipalagip a nagpaputok ti paltog ni Pailma idi rabii ti sabado a nakatamaan ti akin-kannigid nga ima ti maysa a lakay iti Brgy. 1 iti ili ti Vintar.
Naamoan iti imbestigasyon a maipagarup a nasutil ti pulis iti inaramid ni Rodelio Agbayani rason a rimuar daytoy ken iti panagsubli na ket bitbit nan ti 9mm a paltog na.
Sinurot met ti asawa na ti nasao a pulis tapno lapdan ti possible nga aramiden na ngem mabalin nga iti panaganawa ti babai ket nakalbit ni Pailma ti paltog na a nangitunda ti panagputok na.
Saan a natamaan ti bala ti paltog ti nakalugan iti motorsiklo ngem ketdi ti agtaktakder a lakay iti kalsada a ni Ricarte Paelma ti natamaan ken nagsagaba ti sugat iti akin-kannigid nga ima na.
