LAOAG CITY – Sumango ni Jeremy Magaoay, subject ti search operation nga inwayat dagiti kameng ti PNP Bacarra itay bigat iti panaglabsing ti RA 9516 wenno iligal a panagikot ti eksplosibo ken RA 10591 wenno iligal a panagikot ti bala.
Daytoy ti kinumpirmaran ni Police Major Rommel Ramos, hepe ti PNP Bacarra kalpasan ti search operation iti Brgy. 35, Pipias iti nasao nga ili.
Inpetteng ni Ramos a naiwayat a naimbag ti search operation gapu iti alegasyon ni Magaoay nga adda dagiti kameng ti PNP Bacarra a saan a nakauniporme a simrek iti pagtaengan na sakbay ti operasyon ken maipagarup a tinutukan da pay ti paltog.
Segun kenni Ramos, mabalin nga agreklmo met ni Magaoay mainaig iti alegasyon na kontra iti PNP a panagserrek dagiti pulis iti pagtaengan na sakbay a naiserbi ti search warrant.
Innayon na nga awan ti immuneg iti mismo a pagtaengan da sakbay ti operasyon ngem malaksid laeng dagiti napusgan a nagsukisok a kameng ti PNP kabayatan ti operasyon.
Immunan nga inpetteng ni Magaoay a planted dagiti narekobre dagiti otoridad a dua a rifle grenade ken maysa a magasin a naglaon ti pito a bala ti kalibre 45 a paltog.
