LAOAG CITY – Inbatad ni Police Lt. Kester Arellano, ti chief of police ti PNP-Banna a naipilan iti piskalya ti reklamo kontra kadagiti dua a natiliw gapo iti iligal a panagtutupada iti Barangay 10, Macayepyep iti nasao nga ili.
Segun kenni Arellano, urayen da pay ti sungbat ti piskalya seknan iti inpila da a reklamo kontra kadagiti dua.
Inlawlawag na a kalpasan a natiliw dagiti dua ket karaman kadagiti nagpusta ken awanen ti inbutaktak da pay a nagnagan manipud kadagiti nakalibas a nagtutupada.
Kunana a no adda iti highway ket agarop maysa a kilomtero pay ti pagserkan sakbay a madanon ti nakaiyuswatan ti panagtutupada.
Inpakammo na pay a posible nga adda ti posible a lookout dagiti nagtutupada isut gapo na a dagus a nakataray dagiti kaadoan kadagitoy.
Innayon na a posible nga agpapa da met laeng a taga ili ti Banna dagiti nakataray a karaman iti panagtutupada.
Maipalagip a natiliw da Simplicio Samoy y Tungpalan, agtawen ti 53, naasawaan, mannalon, drug surrenderer; ken ni Feil Dominic Tolentino y Baynosa, agtawen ti 21, baro, construction worker, agpada a residente iti Barangay Macayepyep.
Nakumpiskar a iti lugar ti dua ribo a pisos a maipagarop a pusta dagiti suspek, dua a para pallot a manok no sadinno a ti maysa ket natay idinto a ti maysa ket sibibiag, ken dagitoy ket agpada nga addaan ti tari.
