LAOAG CITY – Kinumpirmaran ni Police Capt. Chris Anthony Sorsano, ti chief of police iti ili ti Solsona nga inbasura ti piskalya ti naipila a reklamo nga infanticide kontra iti ina a ni Jerelyn Subac iti Barangay Aguitap, Solsona, Ilocos Norte.
Daytoy ket mainaig iti panangpatay na ti kaipasngay nga anak na a lalaki babaen ti panangibelleng na iti septic tank ti maysa a piggery iti nasao a barangay.
Inlawlawag ni Sorsano a ni Barangay Chairman Ervin Gano ti nagserbi a complainant gapu ta isuna ti napan simmukoan ti nasao nga ina.
Nupay kasta, nagpila met laeng ti kapitan ti Affidavit of Desistance ket inawat met ti piskalya.
Kuna ni Sorsano nga awan ti maaramidan da gapu ta mismon a ti kapitan a complainant ti nangibabawi iti sinapataan na kontra iti nasao nga ina.
Immun-una iti daytoy, inbatad ni Sorsano a sibibiag a naipasngay ti maladaga gapu ta basar kadagiti sumagmamano a residente iti lugar ket adda ti nangngeg da nga agib-ibit nga ubing iti tengnga ti rabii.
Saan met nga inkaskaso dagiti maseknan gapu ta adda pay dagiti dadduma nga ubbing a karruba da.
Rumrumuar a naaramid ni Subac ti nangpatay ti bukod na nga anak gapu ta maipagarop a saan a putot daytoy ti asawa na nga agtrabtrabaho iti agdama idiay Metro Manila.
