LAOAG CITY – Inbatad ni Police Capt. Johnveil Maramag, ti chief of police iti ili a Marcos, a nalawag a road rage ti motibo iti pannakapaltog a poon ti nakatayan ni Police Corporal Wilbert Rarogal Jr., agtawen ti 32, residente idiay Barangay Santiago, Marcos, agdama a nakabakasyon ken nakadestino idiay Ifugao.
Kuna na a daytoy ket basar met laeng kadagiti nagbalin a palawag dagiti kakadwa ni Rarogal ken dadduma pay a testigo.
Inlawlawag ni Maramag a bayat ti panag-overtake ti motorsiklo a nagluganan ni Barangay Chairman Jimmy Pablo iti Barangay Cacafean iti ili a Marcos, ken adda lubbon na a maysa a lalaki a maitudtudo a gunman ket nasagid da ti maysa kadagiti kakadwa ni Rarogal a nakalugan ti traysikel.
Gapu ti daytoy, kuna ni Maramag a nagbinnara ti dua a grupo a nangitunda ti panagpinaltog da a nakatamaan ti barukong ni Rarogal, ken simmalpot pay ti bala iti likud na.
Malaksid ken ni Rarogal, natamaan met ti ligay ti montero ti maysa a saanen a nagpabigbig a Barangay chairman a kadwa ni Pablo.
Kinumpirmaran ni Maramag a ni Pablo ken sumagmamano a kakadwa na a kakapitan ket naggapo da iti maysa a meeting ti agpaidasig a para-mayor iti met laeng nasao nga ili.
Inpakaammo na nga intono bigat ket ipila da babaen iti inquest ti kaso a 1 count ti murder, 4 counts ti attempted murder ken panaglabsing iti Omnibus Election Code kontra ken ni Pablo kalpasan a nagkedked a manginagan ti inlubbon na a gunman.
Nupay kasta, inpasingked ni Maramag nga aramiden da amin a kabaelan da tapno matiliw ti gunman ken maikkan ti naan-anay nga hustisya ni Rarogal.
Mainaig ti daytoy, kuna ni Maramag a kalpasan ti pammaltog ket napan naglemmeng ni Pablo idiay Barangay Sto. Niño iti ili a Nueva Era.
Iti agdama, nagtalinaed iti kustodyar ti PNP-Marcos ni Pablo.
