LAOAG CITY – Inpakaammmu ni Mayor Francisco Espiritu iti ili ti Dumalneg nga agpapan ita ket saan pay a nasarakan ni Dumalneg Municipal Councilor Pedro Cascayan.
Segun iti Mayor agtultuloy latta ti maisaysayangkat a search and rescue operation dagiti kameng ti Philippine National Police iti ili ti Dumalneg, Municipal Incident Command System (MICS), Marine Batallion a nakadestino iti ili ti Pagudpud nga idadauluan ni Lt. Rommel Villamino, nagibaon metten ni Ilocos Norte Police Provincial Director P/Lt.Col. Frederick Obar ti kanayunan a kameng ti pulisiya a naggapu iti Provincial Mobile Force Company nga idadauluan ni P/Cpl. Jed Sta. Maria, pakairamanan ti Regional Mobile Force Batallion manipud iti ili ti Bangui, Bureau Fire Protection ken Barangay Officials.
Kunana a nagkiddaw da payen iti tulong iti opisina ni Governor Matthew Marcos Manotoc ken ni First District Representative Sandro Marcos.
Inlawlawag ni Mayor Espiritu nga apaman ti operasyon da ket adda nakita da a mabalin a nagturogan ni Cascayan gapu ta adda nanganan na iti nalukneng a partes rattan.
Innayonna pay nga iti panagtultuloy ti operasyon ket adda posibilidad a nagturong ni Cascayan iti maysa a kalapaw wenno kubo-kubo iti Sitio Sarguelas iti Brgy. Isic-Isic iti ili ti Vintar sipud ta adda nasarakan da a kallugong na.
Iti agdama, ti kitkitaen ita dagiti rescuers a mabalin a pagturongan ti Konsehal ket kadagiti karayan.
Kabayatanna, makikokordinar da pay kadagiti amin a kakonkontak ni Cascayan tapno matunton ti ayan na.
Maipalagip a Setyembre 21 pay laeng idi naireport a mapukpukaw ni Cascayan ken basar kadagiti otoridad nagturong iti kabambantayan a paset ti Brgy. Quibel tapno agala ti rattan ngem nayaw-awan daytoy no sadinno a ti naudi nga impormasyon mainaig ti lokasyon na ket iti Brgy. Isic-Isic iti ili ti Vintar.
Saan metten a nakaipaay pay ti kanayunan nga impormasyon ni Cascayan no ayan na sipud ta maipagarup a na-lowbat ti selpon na.
