LAOAG CITY – Maladingitan ni Atty. Donato Balderas Jr., Schools Division Superintendent ti Department of Education – Ilocos Norte iti napasamak a panangdangran dagiti dua nga estudiante ti Piddig National High School iti maysa a mangisursuro.
Segun kenkuana, addan ti naawatna nga incident report no sadinno a nailanad ditoy a napaayaban dagiti maseknan iti Principal’s Office tapno agsasaritada ken maiyurnos ti napasamak nga insidente.
Inbatadna a kabayatan ti panagsasarita dagiti agsumbangir a partido ket nagpinnakawanda ken nasolbar ti parikot iti nagbaetanda.
Inlawlawagna a masapol nga adda ti mabukel a Disciplining Committee nga isu ti mangirekomendar no ania dagiti nasken a tignay a maipatungpal.
Kunana nga adda ti bileg ti maseknan a Principal a mangsuspenso kadagiti nasao nga agad-adal ngem agingga iti tallo laeng nga aldaw.
Nupay kasta, iti agdama ket dumaldalan iti Asynchronous Class dagiti dua nga estudiante idinto a naka-work from home ti mangisursuro tapno maliklikan nga agbinnara manen dagitoy.
Maipalagip a kinumpirmaran ni Ms. Marisal Nicolas, Guidance Coordinator ti Piddig National High School a dinangran ti dua nga estudiante nga agkabsat ti maestro a ni Mr. Marlon Agustin.
Immuna iti daytoy, inlawlawag ni Dr. Rizalina Manzano, Principal iti nadakamat a pagadalan a nagsasaritan dagiti dua a partido no sadinno a nagpipinnakawanda ken napintas ti nagbannagan ti nasao a saritaan.
