LAOAG CITY – Napilaanen ti kaso a theft ti maysa a senior citizen a babai a natiliw gapu iti panagtakaw na ti nagduduma a produkto iti mall iti ili ti San Nicolas.
Daytoy ti inpakaammo ni Police Capt. Randy Damo, ti chief of police iti nasao nga ili.
Ti suspek ket agtawen ti 60, balo ken residente ti Perez St. Tonsuya, Malabon City, Metro Manila.
Basar iti imbestigasion, sakbay ti insidente ket inimpormaran ti Beauty Advisor ti Manager-na nga adda ti tallo nga indibidual ti mapagat-atapan ti garawna iti aglawlaw ti maysa kadagiti store iti mall.
Gapu iti daytoy, insigida a rinebyuda ti ala ti Close Circuit Television wenno ti CCTV camera, nakitada ti maysa a saan pay a nabigbig a lalaki ken dua a babbai nga innalada dagiti produkto ken inkabilda iti shoulder bag ken inyawatda dagitoy iti suspek.
Nagal-alisto a timmalaw dagiti nangiyawat kadagiti produkto ken nabati ti suspek iti store rason a natiliw daytoy.
Mainaig iti daytoy, narekobre dagiti otoridad manipud iti suspek ti maysa a Beach Hut Lotion, maysa a Beach Hut Spray ken dadduma pay nga agbalor amin ti 3,996 a pisos.
Iti agdama, nagtalinaed ti suspek iti Philippine National Police iti ili ti San Nicolas.
