LAOAG CITY – Kinumpirmaran ni Sang. Bayan Member Marvin Pascua iti ili ti Solsona nga umaboten iti 50 a shooting incident ti nairekord ti ili da sipud pay idi tawen 2000.
Ti maika-50 ket ti chief Tanod ti Barangay Sta. Ana a ni Fredericko Buenavista.
Gapu iti daytoy ket masapulen nga agtignay ti Municipal Peace and Order Council gapu ta no maiyaleng-aleng daytoy ket adda posibilidad a ngumato pay ti kaso.
Segun ken Pascua, agpapan ita ket saan pay a madeterminar ti rason dagiti shooting incident iti nasao nga ili, rason no apay nga agkalkalikagom isuna a maipasa ti indasar na a gakat pannaka-imbestigar kadagiti shooting incident iti nasao nga ili.
Kunana a nu palubosan ni Mayor Joseph de Lara ti panagimbestigar iti daytoy ket mapagsasaritaan dagiti interventions ken pre-emptive measures a mabalin a solusyon tapno saanen a maulit pay dagiti insidente mainaig iti pammaltog.
Innayonna pay nga isuda kuma nga opisyal ti gobierno ti mangidaulo iti daytoy gapu ta paset ti trabaho da a mangprotektar iti biag dagiti umili.
Pinasingkedan pay ni Pascua a mabalin a ti rason dagiti shooting incident iti ili ti Solsona ket maris pulitika.
Kabayatanna, mangnamnama ti Konsehal a bumaban iti kasao ti pammaltog iti lugarda iti babaen ti panagtitinulong da nga opisyal a mang-imbestigar iti daytoy.
