Ninigar ni Sanggunian Panlalawigan Member Domingo Ambrocio nga awan ti kinapudno dagiti alegasyon kenkuana ni Dumalneg Vice Mayor Francis Espirutu.
Daytoy ket pakaseknan ti maipagarup a panangdawat na iti 300 a ribo a pisos tapno laeng saan a maituloy ti preventive suspension ti bise mayor.
Segun ken ni Ambrocio, saan kuma nga agsungabat iti daytoy nga isyu ngem kasapulan tapno malawlawagan ti nagan na nangruna ket isuna ket maysa nga agpanpanday linteg.
Inadmitir na nga adda ti panagsarita da kenni Espiritu sakbay nga adda ti hearing pakaseknan iti isyu na gapu iti panangdangran na iti maysa a residente a ni Francis Suniga.
Kabayatanna kuna na nga iti sumaruno a panagsarita da kenni Espiritu ket dita a nairapin a napagsaritaan da ti isyu na.
Nu pay kasta, inpetteng ni Ambrocio nga awan a pulos ti inbagbagana kenni Espiritu a mangited ti 300 a ribo a pisos.
Kabayatanna, kuna ni Ambrocio a ti alegasyon a maipagarup a pannaka-impound ti equipment ni Espiritu iti ili Solsona ken nangited ti tallo a milyon a pisos kenkuana ket saan a pulos nga agpayso.
Inlawlawag ni Ambrocio a saan a nairelease dagiti equipment ni Espiritu gapu iti maipagarop a panagquarry.
Innayun na a gapu iti daytoy, ket kasapulan nga agbayad iti multa tapno mairelease dagiti heavy equipment kas naiyataday iti linteg.
Nu pay kasta, inpetteng na a saan a pulos nga immawat ti tallo a milyon a pisos manipod iti bise mayor.
Mailagip nga immunan a nagsarita ditoy Bombo Radyo ni Bise Mayor Espiritu seknan iti maipagarup a panangdawat kenkuana ni Ambrocio iti 300 a ribo a pisos tapno saan a maituloy ti preventive suspension na ken nadawatan ti tallo a milyon a pisos kas bayad iti panagquarry da iti ili ti Solsona.
Kabayatanna, inpetteng ni Atty. Ferdinand Ignacio, ti legal counsel ni Dumalneg Vice Mayor Francis Espiritu a ni Sangunnian Panlalawigan Domingo Ambrocio ti dumawdawat iti 300 a ribo a pisos.
Daytoy ket gapu ta sigurado nga isuna ti nanggegan na a kasarsarita ni Espiritu iti telopono.
Kuna na a nangeggan na nga inbutaktak a mismo ni Ambrocio a ti panagdawat ti kwarta ti lakaran wenno sistema iti provincial court isut gapu na a nasken a mangited ti kwarta kadagiti adda iti hunta probinsyal.
Innayun na a maipagarup a kuna pay ni Ambrocio a saan na lattan nga iramanan nga ikkan daytoy agsipod ta ninong na iti kasar ni Espiritu.
Inkalintegan na a kalikagum na laeng a maaamoan ti pudno ken saan laeng a gapu ta kliyente na ni bise mayor Espiritu.
Immuna iti daytoy, kuna ni Ignacio a saan na nga innaganan iti immuna nga innuman na iti Bombo Radyo ti nadakamat a bokal gapu ta inur-uray na a ti Bise Mayor ti mangkumpirmar iti daytoy.
Maipalagip met nga inbaga ni Ignacio nga iti panagtawag ti maysa a bokal nga isu ni Ambrocio kenni Espiritu ket madama ti teleconference da isut gapu na a nanggeganna dagiti nagsaritaanda.
