LAOAG CITY – Naideklarar nga state of calamity iti siudad ti Batac kalpasan a nauram ti tiendaan.
Segun ken ni Mayor Markee Chua iti nasao a siudad, nangisayangkatda ti special session tapno mangipasa ti maysa a resolusion tapno ideklarar nga state of calamity iti siudad ti Batac.
Inbatadna a daytoy ket babaen iti panangirekomendar ti City Disaster Risk Reduction and Management Office, Department of the Interior and Local Government ken Bureau of Fire Protection – Ilocos Norte tapno maiparuk-at ti pundo a maipaay a tulong kadagiti naapektaran ti uram.
Inlawlawagna a nakasaganan ti food packs a maipaay kadagiti biktima ti uram manipud iti lokal a gobierno ken ti Department of Social Welfare and Development.
Kunana a tumulong ti Micro Small and Medium Enterprise Office ti gobierno probinsial tapno adda ti pagrugian a negosio dagiti biktima ti uram.
Innayonna a gapu iti dakkel nga epekto ti pannakadadael ti nasao a paset ti tiendaan ket saanen a mabalin para iti renovation no diket kasapulanen a ma-demolish daytoy.
Mainaig iti daytoy, nangipaay ti 100 ribu a pisos ni Laoag City Vice Mayor Rey Carlos Fariñas para kadagiti naapektaran a biktima.
Kabayatanna, inpakaammo ni Mr. Jernel Bill Manglal-lan, maysa kadagiti immuna a nakakita ti uram ken residente iti asideg iti lugar a nakapasamakan ti insidente, aggapuda iti maysa a fast food chain idi naobserbaranda ti kasinsinna nga adda ti napuskol nga asok agingga a nakitada ti dakkel nga apoy iti tiendaan.
Immuna iti daytoy, kuna ni Fire Senior Inspector Hendriech Gudoy, City Fire Marshal ti Bureau of Fire Protection iti siudad ti Batac a nangrugi ti uram iti dry goods section no sadinno a masarakan dagiti grocery, paglakoan ti bagas ken dagiti karinderia.
Maipalagip a naan-anay a nasebseban ti uram kalpasan ti sumurok siam nga oras a panangsebseb dagiti bumbero babaen kadagiti 27 a fire truck.
Iti agdama, agtultuloy ti imbestigasion dagiti otoridad iti namunganayan ti uram ken ti balor dagiti nadadael gapu iti insidente.
